Shtetet e Bashkuara vijojnë paraqitjen perfekte në Botërorin 2026, duke mposhtur Australinë me rezultatin 2-0 dhe duke hedhur një hap të madh drejt fazës me eliminim direkt.
Skuadra e drejtuar nga Mauricio Pochettino dominoi takimin që në minutat e para, edhe pse në fushë mungonte Christian Pulisic. Amerikanët kaluan në avantazh në minutën e 11-të falë një autogoli të Burgess, i cili devijoi topin në portën e tij pas një krosimi nga krahu i djathtë.
SHBA vazhdoi të kontrollonte lojën dhe krijoi raste të tjera me McKennie dhe Balogun, ndërsa Australia hasi vështirësi për të reaguar. Në minutën e 43-të, Freeman dyfishoi shifrat me një goditje nga afër, gol që u konfirmua edhe pas rishikimit nga sistemi VAR.
Në pjesën e dytë, amerikanët ruajtën kontrollin e lojës me një zotërim të lartë të topit, ndërsa Australia u përmirësua vetëm pas aktivizimit të Volpato dhe Irankunda. Megjithatë, përpjekjet e "Socceroos" nuk mjaftuan për të rihapur ndeshjen.
Takimi pati edhe një kohë shtesë të gjatë për shkak të një ndërprerjeje, pasi arbitri Felix Zwayer u përball me ngërçe.
Me këtë fitore, SHBA ngjitet në kuotën e 6 pikëve dhe është shumë pranë sigurimit të kualifikimit në fazën me eliminim direkt të Botërorit 2026, duke konfirmuar formën e mirë të skuadrës së Mauricio Pochettinos.
