Ministri i Punëve të Brendshme, Ervin Demo, ka reaguar për protestat duke kërcënuar të rinjtë e të rejat që sot mbushën rrugët e kryeqytetit për të shprehur zemëratën e tyre.
“Zjarrvënësve dhe shkatërruesve të sotëm të pronës publike e private, u them tërhiquni sa nuk është tepër vonë, sepse mes entuziazmit të shkatërrimit në një turmë me maska dhe përgjegjësisë individuale para ligjit, kjo e dyta mund të vonojë po nuk do të harrojë”, tha Demo i fshehur pas perdeve të ndonjë apartamenti apo hoteli.
Duke iu drejtuar veçanërisht studentëve të mjekësisë, të cilët i cilësoi si ndër nxënësit më të mirë, Demo theksoi se qeveria dhe Partia Socialiste do të jenë në mbështetje të tyre, pavarësisht bindjeve politike apo qëndrimeve që ata mund të kenë.
“Unë, Kryeministri, qeveria jonë, Partia Socialiste, kemi qenë dhe jemi gjithnjë me ju dhe për ju! Edhe kur ju nuk jeni me ne, nuk votoni për ne apo mendoni ndryshe nga ne, ne jemi këtu për ju!”, u shpreh ministri i cili një ditë më parë kyci gojën për dhunën policore ndaj të rinjve.
