Në vitin 2025, në Bashkimin Evropian u regjistruan 6.9 milionë fluturime komerciale, një rritje prej 3.8% krahasuar me vitin 2024, kur u regjistruan 6.7 milionë fluturime.
Sipas Eurostat, numri i fluturimeve është rritur në mënyrë të vazhdueshme që nga viti 2021 dhe, në vitin 2025, u rikthye në një nivel të ngjashëm me atë të periudhës para pandemisë, kur në vitin 2019 u regjistruan 7.0 milionë fluturime.
Fluturimet komerciale jo të rregullta, përfshirë fluturimet charter dhe fluturime të tjera speciale, përbënin 8.5% të totalit të fluturimeve në vitin 2025. Muajt e verës: qershori (648 mijë e 707 fluturime në total), korriku (690 mijë e 855) dhe gushti (693 mijë e 46), shënuan numrin më të lartë të fluturimeve jo të rregullta, përkatësisht 11.2%, 12.3% dhe 11.4% të fluturimeve totale.
Schiphol i Amsterdamit, aeroporti me numrin më të madh të fluturimeve komerciale
Numri më i lartë i fluturimeve komerciale, të rregullta dhe jo të rregullta, në vitin 2025 u regjistrua në aeroportin Schiphol të Amsterdamit, në Holandë, me 488 mijë fluturime. Ai u pasua nga aeroporti Paris-Charles de Gaulle në Francë, me 476 mijë fluturime, dhe Frankfurt/Main në Gjermani, me 457 mijë fluturime.
Ndër 10 aeroportet me numrin më të madh të fluturimeve komerciale, përqindja më e lartë e fluturimeve jo të rregullta u regjistrua në Athina/Eleftherios Venizelos në Greqi (5.2%), Adolfo Suárez Madrid-Barajas në Spanjë (4.8%) dhe København/Kastrup në Danimarkë (4.1%)./ Tv Klan
