Protesta kombëtare në ditën e 35-të para Kryeministrisë është shoqëruar edhe me një moment simbolik. Me rastin e ditëlindjes së kryeministrit Edi Rama, protestuesit kanë sjellë një tortë. Mbi të ishte shkruar mesazhi: "Populli të uron! Jepe dorëheqjen, merr dhe Saliun me vete."
Mesazhi pasqyron frymën që ka marrë protesta gjatë javëve të fundit. Ajo që nisi si një reagim kundër projektit në Zvërnec është shndërruar në një lëvizje më të gjerë kundër klasës politike, me protestuesit që kërkojnë largimin jo vetëm të kryeministrit Edi Rama, por edhe fundin e asaj që e cilësojnë si establishmenti politik.
Në protestën e sotme, ku është regjistruar një pjesëmarrje e lartë e qytetarëve dhe e diasporës, kanë dominuar thirrjet "Rama në burg, Berisha në burg", "Revolucion", "Shqipëri e re", "Dorëheqje" dhe "Lironi çunat", në mbështetje të protestuesve të arrestuar pas përplasjeve me policinë gjatë tubimit të së enjtes para Kuvendit. /LAPSI.al
