Detaje të reja janë zbardhur nga vrasja e 24-vjeçarit shqiptar Nurian Dalipaj në Vescovato, në provincën e Cremonës, Itali. Sipas mediave italiane, i riu është sulmuar me thikë nga partneri i ri i ish-të dashurës së tij, ndërsa hetuesit po shqyrtojnë pistën e një konflikti me motive sentimentale.
Për ngjarjen është arrestuar 32-vjeçari italian Mattia Miraglia, banues në Vescovato, i cili ndodhet në spital nën mbikëqyrjen e policisë, pasi mbeti i plagosur gjatë përleshjes. Ndaj tij rëndon akuza për vrasje.
Sipas rindërtimit paraprak të hetuesve, konflikti ka nisur mbrëmjen e së dielës në Cremona, ku mes katër personave ka shpërthyer një debat i fortë verbal.
Pavarësisht se përplasja fillestare ishte ndërprerë, tensionet kanë vijuar. Më pas, dy shqiptarët janë drejtuar pranë banesës së 32-vjeçarit në rrugën ‘Via Cairoli’, në Vescovato, ku konflikti është rindezur.
Përleshja më pas është zhvendosur në qendrën e qytetit, nën portikët e Piazza di Vescovato.
Sipas autoriteteve italiane, gjatë përleshjes janë përdorur thika. Nurian Dalipaj është goditur disa herë, kryesisht në zonën e fytit dhe barkut, plagë që rezultuan fatale.
Një shqiptar tjetër që ndodhej me të ka mbetur i plagosur, por ka arritur të largohet nga vendi i ngjarjes dhe ka hyrë në një lokal, duke kërkuar ndihmë. Dëshmitarët kanë deklaruar se pak më vonë ai është marrë me forcë nga persona të tjerë të përfshirë në konflikt dhe është futur në automjetin ku ndodhej edhe Dalipaj.
Më pas automjeti është larguar nga vendi i ngjarjes.
Edhe Mattia Miraglia ka mbetur i plagosur gjatë përleshjes dhe është transportuar në spital në gjendje të rëndë. Aktualisht ai ndodhet nën masën e sigurisë në mbikëqyrjen e autoriteteve.
Karabinierët e Njësisë Operative të Cremonës kanë sekuestruar provat në vendngjarje dhe po vijojnë hetimet për të përcaktuar me saktësi dinamikën e konfliktit, rolin e secilit person të përfshirë dhe motivin e plotë të krimit.
Sipas mediave italiane, pista kryesore lidhet me një konflikt të shkaktuar nga xhelozia dhe marrëdhëniet sentimentale, por ky version ende nuk është konfirmuar zyrtarisht nga autoritetet italiane.
