Mbi 107 kilogramë kanabis i llojit “Gelato” me vlerë rreth 1.2 milionë euro është kapur në Portin e Durrësit.
Policia bën me dije se sasia masive e drogës u gjet brenda një kamperi të transportuar drejt Shqipëri me kontejner, të ardhur nga Kanadaja.
Blutë informojnë më tej se për rastin janë shpallur në kërkim 2 persona, identitetin e të cilëve ende nuk e ka bërë ende publik për arsye hetimi. Ata akuzohen për veprën penale “Trafikimi i narkotikëve”.
Njoftimi i plotë i policisë:
Në kuadër të hetimeve të drejtuara nga Prokuroria, në Portin e Durrësit, gjatë kontrollit të një kontejneri të ardhur nga Kanadaja, brenda të cilit ndodheshin 2 automjete dhe 1 kamper, u ushtrua kontroll i imtësishëm.
Gjatë kontrollit të kamperit, në hapësira të modifikuara dhe të mbuluara me veshje druri, u gjetën të fshehura 190 pako me lëndë të dyshuar narkotike cannabis sativa “Gelato”, me peshë totale 107.7 kg.
Vlera e lëndës narkotike të sekuestruar përllogaritet në treg në rreth 1.2 milionë euro.
Gjithashtu, gjatë kontrollit u sekuestruan, në cilësinë e provës materiale, edhe 43 cigare elektronike, disa prej të cilave me mbishkrime që deklaronin përmbajtje të lartë THC.
Nga hetimet dyshohet se lënda narkotike sigurohej në Kanada dhe transportohej drejt Shqipërisë, e fshehur në vende të posaçme, të modifikuara në mjetet e porositura për blerje.
Në vijim të veprimeve hetimore, u shpallën në kërkim, si të dyshuar për veprën penale “Trafikimi i narkotikëve”, dy shtetas, për të cilët, për arsye hetimi, nuk bëhen me dije gjeneralitetet.
Strukturat hetimore të DVP Durrës vijojnë veprimet për dokumentimin e plotë ligjor të rastit, përcaktimin e origjinës dhe destinacionit të lëndës narkotike, si dhe identifikimin, lokalizimin dhe kapjen e personave të tjerë të përfshirë në këtë veprimtari kriminale.
Materialet procedurale i kaluan Prokurorisë për veprime të mëtejshme.
