Drejtori i policisë së Vlorës, Elidon Çela është shkarkuar, pas prodhimit të një njoftimi të gënjeshtërt për protestën në Zvërnec. Lidhur me tërheqjen zvarrë të një aktivisti nga badigardë privatë, policia lokale njoftoi:
"Gjatë tubimit, situata është përshkallëzuar dhe një grup protestuesish kanë kryer veprime të dhunshme me qëllim prishjen e rrethimit të kantierit të kompanisë.
Në këto rrethana, njëri prej protestuesve, shtetasi E. S., është futur me forcë brenda rrethimit të kantierit dhe është shoqëruar nga punonjësit e shoqërisë private të sigurisë në ambientin e përcaktuar për rojet. Gjatë shoqërimit nga punonjësit e shoqërisë private të sigurisë, shtetasit E. S. i janë shkaktuar dëmtime trupore".
Por e vërteta ka qenë ndryshe. Dhe duke parë reagimin e fortë në rrjetet sociale Drejtoria e përgjithshme e ka përgënjeshtruar vartësin e saj, duke e shkarkuar drejtorin Çela. Ajo doli me njoftim:
"Drejtoria e Përgjithshme e Policisë së Shtetit kërkon ndjesë publike për raportimin e gabuar të Drejtorisë Vendore të Policisë Vlorë, lidhur me qytetarin, që në fakt nuk është futur me forcë brenda rrethimit të kantierit, sikundër është raportuar.
Në këto rrethana dhe pavarësisht se në të gjithë pjesën tjetër komunikata e Drejtorisë Vendore të Policisë Vlorë është korrekte, Drejtori i Përgjithshëm i Policisë së Shtetit ka vendosur pezullimin e menjëhershëm nga detyra të Drejtorit të Drejtorisë Vendore të Policisë Vlorë".
LAPSI.AL
