Një zyrtar i lartë i partisë në pushtet në Republikën Demokratike të Kongos është rrahur për vdekje pasi mori pjesë në një emision radiofonik, ku bëri thirrje për masa parandaluese kundër epidemisë së Ebolës. Ngjarja ndodhi të dielën në Butembo, në provincën e Kivusë së Veriut. Marie-Celestine Carontois, presidenti në detyrë i komitetit ekzekutiv federal të partisë UDPS në Butembo, u sulmua nga banorë të zonës pas daljes së tij në radio.
Sipas raportimeve nga mediat e huaja, sulmuesit i morën sendet personale dhe i vunë flakën banesës, ku pësoi plagë të rënda dhe ndërroi jetë pak më vonë. Ende nuk dihet identiteti i autorëve, numri i personave të përfshirë apo motivi i saktë i sulmit. Ngjarja ka rikthyer në vëmendje tensionet dhe mosbesimin e vazhdueshëm të një pjese të popullsisë ndaj ekipeve që po përballen me epideminë e Ebolës.
Vetëm një ditë më parë, persona të armatosur sulmuan një pikë kontrolli në zonën e Benit, duke vrarë të paktën një person dhe plagosur disa të tjerë. Sipas të dhënave zyrtare të publikuara të hënën, numri i rasteve të konfirmuara me Ebola në vend ka kaluar 8 mijë, ndërsa viktimat kanë arritur në 3,901. Shpërthimi, i shkaktuar nga lloji Budibugyo i virusit, është raportuar si më i madhi dhe më vdekjeprurësi në historinë e Republikës Demokratike të Kongos.
