Ai priti me durim në stol, por e dinte se cili do të ishte fati i tij dhe i Argjentinës. Lautaro Martinez u bë heroi i Albicelestes me golin që e dërgoi kombëtaren në finalen e dytë radhazi të Botërorit. Sulmuesi vulosi përmbysjen e jashtëzakonshme ndaj Anglisë dhe u emocionua si rrallëherë më parë. Ishte goli më i rëndësishëm me fanellën e Argjentinës, një ëndërr e realizuar pas shumë vitesh.
Në intervistën pas ndeshjes për kanalet e FIFA-s ai nuk arriti t’i përmbante emocionet dhe shpërtheu në lot, ndërsa fliste për ditën perfekte, atë që e kishte ëndërruar që kur gjyshi i kishte blerë këpucët e para të futbollit. Në finale do të përballet me Spanjën për të fituar Botërorin e dytë radhazi, një ëndërr që u bë e mundur edhe falë golit të tij në minutat e fundit.
Lautaro emocionohet gjatë intervistës
Në fushë kishte derdhur tashmë disa lot gëzimi, por para kamerave u dorëzua plotësisht, duke menduar për familjen dhe rrugëtimin e tij. Lautaro Martinez mezi arrinte të fliste. “Herën e parë që gjyshi më bleu një palë këpucë, ëndërroja të shënoja një gol si ky. E kam ëndërruar gjithmonë. E gjithë kjo vlen më shumë se një gol dhe më shumë se një finale. Në stadium janë fëmijët e mi, të cilët ma kanë ndryshuar jetën. Po e shijoj çdo moment.”
Argjentinasi tregoi se e kishte parashikuar fundin e ndeshjes. “Ia kisha thënë Facundo Medinës: ‘Do të futem, do të shënoj dhe do të fitojmë’. Ishte e vështirë, por ia dolëm. Edhe Enzo shënoi një gol fantastik.” Gabimet e Anglisë i hapën derën Argjentinës, që përfitoi nga situata. “Tani që jam më i qetë mund ta them: kjo skuadër po tregon nga çfarë brumi është bërë. Ata u tërhoqën prapa, ndoshta u lodhën. Na ushtruan presion për 60 minuta, por më pas u mbyllën. Kjo na dha qetësi për të menaxhuar topin. Pas tre vitesh e gjysmë po luajmë një tjetër finale.”
Të dielën, Lautaro do të përballet me Spanjën në finalen e madhe, me objektivin për të mbrojtur titullin botëror të fituar në Katar në vitin 2022.
