Protesta kundër qeverisë hyn sot në ditën e 93-të. Prej më shumë se tre muajsh, qytetarët dalin çdo ditë në shesh dhe këmbëngulin se mobilizimi do të vijojë deri në realizimin e kërkesave të tyre. Dorëheqja e kryeministrit Edi Rama dhe largimi i qeverisë mbetet objektivi kryesor. Protestuesit kërkojnë gjithashtu ndryshimin e sistemit politik dhe të mënyrës së përfaqësimit të qytetarëve.
Një tjetër pikë e platformës së tyre është krijimi i një qeverie tranzitore me mandat 12-mujor. Sipas protestuesve, ajo duhet të krijojë kushtet për ndryshime politike dhe institucionale, si dhe t’i hapë rrugë një procesi të ri zgjedhor.
Në listën e kërkesave është edhe shfuqizimi i disa ligjeve që, sipas tyre, cenojnë interesin publik.
Ashtu si në ditët e mëparshme, qytetarët pritet të mblidhen fillimisht në sheshin “Skënderbej” dhe më pas të marshojnë drejt Kryeministrisë. Aty do të mbahen fjalimet e aktivistëve dhe pjesëmarrësve, përpara marshimit në rrugët e kryeqytetit.
Pas 93 ditësh protestë të pandërprerë, mesazhi i organizatorëve mbetet i njëjtë: nuk do të ketë tërheqje deri në realizimin e kërkesave të shpallura.
