“Së bashku gjithçka është e mundur”, ky ishte mantra që Antonio Conte donte të fuste në mendjen e lojtarëve të tij. Një slogan që trajneri e kishte vendosur edhe fizikisht në një lloj “tabele titulli” të varur në palestrën e Castel Volturno. Kjo të paktën del nga një postim në rrjetet sociale i Giovane.
Braziliani, i ardhur te Napoli në merkaton e janarit, publikoi një seri fotosh dhe videosh në profilin e tij në Instagram, ku në një video stërvitjeje mund të shihej në sfond një tabelë e varur në mur. Titulli, siç u përmend më sipër, ishte “Së bashku gjithçka është e mundur”. Poshtë saj ishte kalendari i napolitanëve nga java e 29-të e kampionatit e në vazhdim, pikërisht në periudhën kur Inter po lëkundej me vetëm dy pikë në tri ndeshje (humbja në derbi dhe barazimet me Atalantën dhe Fiorentinën). Edhe në komunikimin e tij Conte nuk e kishte fshehur këtë: “Askush nuk duhet të na pengojë të shohim përpara, sot kemi ushtruar pak presion mbi ata që janë para”, kishte deklaruar trajneri salentin pas fitores 0-1 ndaj Cagliarit, e katërta radhazi.
Pranë çdo ndeshjeje ishte shkruar rezultati final: Napoli-Lecce 2-1, Cagliari-Napoli 0-1, Napoli-Milan 1-0, Parma-Napoli 1-1. Më pas seria ndërpritet te Napoli-Lazio. Humbja në shtëpi 0-2 që, sipas vetë lojtarëve të Napolit, i preu përfundimisht këmbët ëndrrës së përmbysjes. “Ne besonim te ajo shkëndijë, te një hap fals që mund të rihapte gjithçka. Me barazimin në Parma dhe fitoren e Interit gjithçka u shua. Ishte një ëndërr, edhe e vështirë për t’u realizuar: ne vazhdonim të shtynim përpara dhe secili prej nesh shpresonte”, deklaroi Spinazzola pas humbjes në “Maradona” kundër skuadrës së teknikut Sarri.
Giovane publikoi videon disa ditë pas fitores ndaj Pisës që siguroi kualifikimin në Champions League-n e ardhshme. Megjithatë, nuk mund të dihet nëse videoja e stërvitjes është regjistruar përpara Napoli-Lazio dhe është publikuar më vonë. Gjithsesi, gjithçka të bën të mendosh se pas hapave fals kundër Parmës dhe Lazios, Conte dhe skuadra e tij ndalën së besuari te përmbysja dhe, për pasojë, ndalën edhe plotësimin e tabelës.
