Frustrimi nga masiviteti i protestave që kanë tronditur pushtetin e Edi Ramës ka degraduar në dhunë shtazore ndaj disa të rinjve që kishin dalë këtë të martë para parlamentit. Pamjet e dhunës policore janë shokuese.
Shkak u bë një bërthamë e protestuesve prej disa dhjetëra burra, gra, djem dhe vajza që u gjendën përballë një brutaliteti të pazakontë nga forcat e policisë, që morën urdhër të reagojnë ashpërsisht ndaj qytetarëve.
Shkak i këtij shpërthimi u bënë disa vezë të hedhura ndaj makinave të deputetëve dhe ministrave të Partisë Socialiste, në momentin që këta dilnin nga oborri i parlamentit.
Para këtyre momenteve, protesta kishte qenë e qetë dhe policët i kishin menaxhojnë përpjekjet e qytetarëve për të hyrë në parlament.
Por sapo vezët e para u hodhën drejt makinës së Blendi Gonxhes, ministër i turizmit dhe ndaj disa makinave të tjera të deputetëve socialistë, policia që deri në atë moment kishte reaguar me tolerancë ndaj protestuesve ka marrë urdhër për t'i goditur dhe për t'i arrestuar.
Brenda pak sekondash, në ndihmë të uniformave blu kanë ardhur forcat e ndërhyrjes së shpejtë që kanë tërhequr zvarrë disa të rinj, duke shtrirë në tokë të tjerë, duke i goditur me shqelma dhe grushta dhe duke i mbajtur të shtrirë në tokë, për t'i prangosur.
Mes të arrestuarve është edhe Dritan Goxhaj, një prej pjestarëve të grupit organizator të protestës paqësore, që është shënjestruar jo rastësisht nga policia. Arrestimi i tij nuk duket i rastësishëm. Goxhaj ka qenë objekt i sulmeve të vazhdueshme të kryeministrit Edi Rama dhe i shpurës së ministrave socialistë, si për të shkuarën e tij në radhët e UÇK, ashtu edhe për qëndrimet publike të mbajtura në media.
Por përtej emrave konkretë, reagimi i policisë para kuvendit ishte më shumë shprehje e frustrimit për protestën masive ku dolën dhjetëra mijëra qytetarë dhe që prej një muaji ka mbajtur nën tension kupolën e qeverisë dhe duke ngritur pikëpyetje nëse pushteti i kësaj mazhorance është vërtet drejt fundit apo jo./Lapsi.al
