Një 35-vjeçar që po lundronte me gomone në Himarë, ka rënë në det gjatë drejtimit të mjetit dhe ka marrë dëmtime në njërën këmbë. Ai ka arritur të dalë në Gjirin e Llamanit ku u gjet nga Policia Kufitare. Ndërkohë, gomonia vazhdonte të lëvizte pa kontroll, duke paraqitur rrezik serioz për mjetet e tjera lundruese dhe pushuesit në zonë.
35-vjeçari u transportua në spital për të marrë ndihmë mjekësore dhe sipas autoriteteve, ndodhet jashtë rrezikut për jetën.
Njoftimi i policisë:
Ndërhyrja e menjëhershme e shërbimeve të Policisë Kufitare në Himarë shmangu sot një ngjarje me pasoja të rënda në det.
Pas njoftimit se një gomone po lëvizte në mënyrë të pakontrolluar dhe me shpejtësi, pa persona në bord, shërbimet e Policisë Kufitare ndërhynë menjëherë në zonën e “Kepit të Rigonit”, përballë plazhit të Llamanit.
Nga verifikimet rezultoi se drejtuesi i mjetit lundrues, shtetasi E. M., 35 vjeç, banues në Orikum, kishte rënë në det gjatë lëvizjes dhe kishte dalë në gjirin e Llamanit, i dëmtuar në këmbë. Ai u transportua në spital për ndihmë mjekësore dhe ndodhet jashtë rrezikut për jetën.
Gomonia, e cila paraqiste rrezik për mjetet e tjera lundruese dhe për pushuesit, u vu nën kontroll nga Njësia Policore Detare dhe Policia Kufitare. Një punonjës i Njësisë Policore Detare mundi të hidhej në bordin e gomones dhe ta ndalonte atë. Më pas, mjeti lundrues u tërhoq në PKK Himarë për verifikime të mëtejshme.
