Gjatë mbledhjes së grupit parlamentar të Partisë Socialiste, kryeministri Edi Rama i është përgjigjur prerë kërkesës së protestuesve për “Shqipërinë e re”, duke i sfiduar ata të prezantojnë një projekt konkret. Kreu i qeverisë u bëri thirrje kritikëve që të sjellin draftin e tyre për “Shqipërinë e re”, ndonëse shprehu skepticizëm se një plan i tillë ekziston.
Ai theksoi se vendi ndodhet në një fazë të rëndësishme zhvillimi dhe se pakënaqësitë e shfaqura janë thjesht shprehje e pritshmërive të rritura të shoqërisë.
“Ka një element tjetër, që e tregon historia dhe ata që e kanë treguar se si zhvillohet bota. Ky element quhet pakënaqësia e pritshmërive. Është shprehja më kuptimplotë e një vendi që ka dalë nga një fazë dhe ka hyrë në një fazë tjetër. Ajo që na takon është që ne të vazhdojmë. Planet tona janë në tryezë. Ka intelektualë që thonë që kjo kartë e BE-së, është kartë e lodhur. Karta e BE-së është karta e historisë së Shqipërisë, unë nuk kam karta të miat. Ne nuk jemi këtu për të fituar numrin e klikimeve të ditës, ne jemi këtu për të fituar Shqipërinë 2030 në BE. Është edhe një thirrje për një marrëveshje të re për një “Shqipëri të re”, ka edhe shpirtra këtu që kërkojnë një Shqipëri të re, le të na e sjellin draftin. Kam frikë se “Shqipëria e re” nuk do të vijë kurrë.”
