Njëri prej protestuesve të liruar këtë të shtunë me vendim të Gjykatës së Tiranës ishte edhe Niko Qarkaj, i cili ishte arrestuar pas protestës së zhvilluar të enjten para Parlamentit.
Pas daljes nga Komisariati nr. 3, ku u prit nga dhjetëra mbështetës, Qarkaj hipi mbi kangjellat e hyrjes, nxori nga xhepi një vezë dhe deklaroi: "Kjo ishte arma ime", përpara se ta hidhte në oborrin e komisariatit.
Qarkaj dhe protestuesit e tjerë u arrestuan me akuzat për prishje të qetësisë publike, shkatërrim prone dhe kundërshtim me dhunë të punonjësve të policisë.
Sipas mbështetësve të tij, gjatë qëndrimit në komisariat ai është dhunuar nga efektivët e policisë dhe ka pësuar kriza epilepsie. Një episod i tillë u regjistrua edhe gjatë seancës gjyqësore, ku ai pati një tjetër krizë shëndetësore. Gjykata vendosi lirimin e tij, duke vlerësuar se nuk kishte prova të mjaftueshme për të mbështetur arrestimin.
