Kryeministri Edi Rama e nisi mëngjesin duke prezantuar në rrjetet sociale automjetet ushtarake të TIMAK Defence si “prodhimin e parë Made in Albania” sipas standardeve të NATO-s. Por, ndërsa postimi synonte të nxirrte në pah lindjen e industrisë ushtarake shqiptare, përdoruesve të rrjeteve sociale u ranë menjëherë në sy logot e Toyota dhe MAN, të dukshme në automjetet e ekspozuara.
Komentet nuk vonuan. “Kush i prodhoi automjetet? Rama edhe sot i mashtroi shqiptarët me makinat gjermane MAN dhe fuoristradat japoneze Toyota”, shkruan një komentues.
Një tjetër e mori me sportivitet: “Japonia ka makina t’mira… Edhe Gjermania, sigurisht!”
Por komenti që tërhoqi më shumë vëmendje ishte ai i një përdoruesi që shkroi: “Një Land Cruiser i vjetër familjar, i punuar për off-road s’po shoh tjetër gjë unë, kryeministër. Shiko kanisterat si i kanë lidhur sipër.”
Mes ironive pati edhe nga ata që u përpoqën të sqaronin se bëhet fjalë për automjete të markave ekzistuese, të modifikuara për përdorim ushtarak, dhe jo për mjete të projektuara apo prodhuara nga e para në Shqipëri.
Ndoshta ky ishte edhe shpjegimi që mungonte në postimin e kryeministrit. Sepse mënyra si u paraqitën automjetet krijon të njëjtën përshtypje sikur t’i vendosësh një iPhone-i një kasë me flamurin shqiptar dhe më pas të shpallësh me krenari se Shqipëria më në fund prodhon iPhone “Made in Albania”.
