Kryeministri Edi Rama nuk i ka pritur aspak mirë kritikat e gazetarit Mustafa Nano për çështjen e protestave ndaj projektit të Zvërnecit.
Në një takim që mbajti me socialistët në Elbasan, Rama shigjetoi të gjithë gazetarë dhe blogerë që po dalin në protestë.
“Ne nuk jemi tradhtarë, na tregojnë këta korrupsionin, blogerë që nuk lënë para pa mbledhur duke treguar të gjitha anët e trupit që unë i ka treguar pa lekë kur isha i ri. Dhe një euro taksë nuk paguajnë ata. Na tregojnë ne tradhtarët disa analistë e gazetarë që paguhen me lek në dorë. Vijnë këtej dhe u qajnë hallit flamengove…” – tha Rama që ishte më i ashpër me Mustafa Nanon.
“Moral nga Mustafa Nano? Që erdhi në zyrën time u shtri në kolltuk dhe tha nuk kam fuqi të merrem me këtë vend, dua të shkoj ambasador”, - tha Rama.
Ish-ambasadori Mustafa Nano, i cili në 2014 u bë i famshëm me shprehjen "të gjithë qelbësirat bashkë" për të sjellë “Rilindjen” në pushtet i ka këshilluar kryeministrit Edi Rama largimin.
Në një analizë të shkurtër në MCN, Nano parashikon një largim normal: të japë dorëheqjen, të zhvillojë zgjedhje të reja brenda PS dhe të zgjidhet një lider i ri.
Sipas Nanos, shqiptarët nuk janë më të gatshëm të pranojnë faktin që Rama duhet të sundojë vendin me një grup oligarkësh, që janë të vetmit që kanë akses në zyrën e kreut të qeverisë.
Ai thotë se ky fakt i ka çuar shqiptarët në një zemërim, që ka kulmuar me këto protesta masive në rrugët dhe sheshet e Tiranës.
“Këshilla ime është vetëm një. të mendojë largimin. Jo largimin me idenë që pas meje të bëhet qameti, por një ikje normale, të përcjellë stafetën, të organizojë zgjedhje brenda PS, të zgjidhet një lider i ri dhe ky pastaj njatjeta.
Madje po të dojë të na hedhë fytyrës edhe ndonjë lloj le të themi justifikimi, të tipit që “ju nuk ishit në gjendje të më kuptonit mua. Unë me mendjen time jam me qindra vite para, ju jeni këtu në vitin 2030” – tha Nano. ©LAPSI.al
