Ylber Ramadani kërkon një tjetër qasje nga Kombëtarja në Nations League. Mesfushori kuqezi paralajmëron vështirësi ndaj Bjellorusisë, por thekson se objektivi është i qartë: Shqipëria kërkon vendin e parë në grup. E qartë është se për Shqipërinë nuk ka më vend për qasje të ngjashme me atë të miqësoreve të fundit, ndaj dhe përballë Bjellorusisë, mesfushori kuqezi kërkon seriozitet maksimal dhe një tjetër mentalitet. “Duhet të futemi shumë seriozisht, të ndryshojmë mentalitetin nga dy ndeshjet e fundit miqësore. Të futemi që të fitojmë dhe të shkojmë përpara.”
Ramadani ndalet edhe te ideja e lojës së trajnerit, me presing të lartë dhe një Shqipëri që synon ta marrë kundërshtarin më përpara. “Që nga fillimi, trajneri kur ka ardhur, na ka bërë të qartë që dëshiron të luajë në presing të lartë dhe dëshiron që ta marrim kundërshtarin më përpara”. Sa i përket rolit të tij në formacion, Ramadani tregon se është i gatshëm të pranojë çdo vendim të trajnerit. Për të, interesi i Kombëtares është mbi atë personal. “Këtu jemi në kombëtare dhe përfaqësojmë Shqipërinë. Luajta apo jo, nuk e kam problem. Do i mbështes çunat si brenda dhe jashtë. Vetëm për të arritur objektivin që kemi si skuadër.”
Edhe pse çdo futbollist dëshiron të jetë titullar, mesfushori kuqezi thotë se vendimet i takojnë trajnerit dhe ai do t’i mbështesë ato. “Të gjithë kanë dëshirë që të luajnë dhe përfaqësojnë shtetin e tyre. Këtu zgjedhjet dhe të gjitha i bën trajneri dhe jam 100% me të. Po luajta apo jo, nuk ka problem. Vetëm të fitojmë dhe të arrijmë rezultatin që duam.”
Në fund, Ramadani vendos theksin te objektivi i Shqipërisë. Sipas tij, futbolli i sotëm nuk lejon nënvlerësimin e asnjë kundërshtari, ndaj çdo ndeshje duhet përballuar me të njëjtin seriozitet. "Nuk ka skuadër të lehtë, të gjithë vrapojnë dhe luftojnë. Secila skuadër mund të surprizojë. Ne kemi objektivin tonë, e ka shprehur dhe trajneri. E shprehim edhe ne. Dëshirojmë të dalim të parët në grup.”
