Rusia dhe Ukraina kanë shkëmbyer sulme gjatë natës, duke shkaktuar viktima dhe të plagosur në të dyja vendet. Në Kiev, sulmet ajrore ruse lanë të paktën dy të vdekur dhe 10 të plagosur. Goditjet erdhën pas tre ditësh qetësie relative në kryeqytetin ukrainas.
Ndërkohë, dronët ukrainas goditën qytetin rus të Saratovit. Autoritetet lokale raportuan dëme në infrastrukturën civile dhe të paktën 10 të plagosur, mes tyre tre fëmijë. Sulmet ruse vendosën në gatishmëri edhe Poloninë. Varshava ngriti avionët ushtarakë dhe aktivizoi sistemet e mbrojtjes ajrore pranë kufirit me Ukrainën. Përshkallëzimi vjen ndërsa përpjekjet diplomatike për një armëpushim mes Moskës dhe Kievit vijojnë pa rezultate konkrete.
