Trump donte të futej në foton e ceremonisë së Spanjës kampione bote, por Rodri ia prish planet

Spanja u shpall kampione bote në një Botëror që kurorëzoi skuadrën më të mirë, më të fortë dhe më të kompletuar të turneut, duke fituar edhe shumë çmime individuale që nënvizuan cilësinë e jashtëzakonshme të ekipit të Luis de la Fuente. Megjithatë, në ceremoninë e ndarjes së trofeut kishte shumë pritshmëri për të parë nëse do të respektohej protokolli i FIFA-s apo nëse do të kishte një tjetër “përmbysje”, pasi prania e Donald Trump në podium nuk kaloi pa u vënë re dhe kishte një precedent të rrezikshëm nga Kupa e Botës për Klube e verës së kaluar, kur ai arriti të futej edhe në fotot zyrtare të Chelsea kampion. Por kapiteni Rodri realizoi driblimin e fundit në mënyrë perfekte, duke pritur që presidenti amerikan të largohej anash përpara se të niste festa.

Trump e provon sërish: tenton të futet edhe në fotot e Spanjës

Një skenë përtej çdo kufiri të sikletit ndodhi po në Shtetet e Bashkuara gjatë Kupës së parë të Botës për Klube me formatin e ri të FIFA-s. Donald Trump nuk u largua nga podiumi, duke qëndruar në qendër të skenës dhe duke dalë në të gjitha fotot zyrtare të Chelseat kampion, gjë që shkaktoi ironi dhe polemika, pasi nuk respektoi traditën që podiumi t’u lihej fituesve. Edhe në ceremoninë e Spanjës, dyshja Infantino-Trump ishte sërish në qendër të vëmendjes, por këtë herë gjërat morën një rrjedhë tjetër, edhe pse jo për vullnet të presidentit amerikan.

Lëvizja e Rodrit: pret që Trump të largohet për të nisur festën e Spanjës

Ishte vetë kapiteni Rodri ai që priti derisa Donald Trump të largohej nga qendra e podiumit. Me trofeun në duar, gati për ta ngritur lart dhe për të përjetësuar momentin më të bukur të turneut, mesfushori spanjoll priti që presidenti amerikan të përfundonte përshëndetjet dhe shtrëngimet e duarve me lojtarët. Vetëm kur Trump pothuajse doli nga kuadri i kamerave, Rodri nisi festën. Një lëvizje e nevojshme për të pasur një kujtim të paharrueshëm pa ndërhyrës, edhe pse jo plotësisht e suksesshme, pasi Trump mbeti gjithsesi në podium, i spostuar në të djathtë, derisa Infantino e ftoi të zbriste për t’ia lënë skenën Spanjës.

Të gjitha ndërhyrjet e Trump në Botërorin 2026: rasti i bujshëm “Balogun”

Në fund të fundit, ndërhyrjet e Trump në këtë Botëror kanë hyrë tashmë në histori. Që nga prezantimi zyrtar i turneut në SHBA, vendi organizator së bashku me Kanadanë dhe Meksikën, presidenti amerikan ka dalë vazhdimisht jashtë protokolleve tradicionale.

Kulmi ishte ndërhyrja në rastin e njohur “Balogun”, kur me një telefonatë ndaj Infantinos ndikoi që t’i hiqej pezullimi futbollistit amerikan, duke shkaktuar një stuhi polemikash rreth turneut. Më pas, pak para finales, iu dha mundësia të prekte edhe Kupën e Botës në tribunë, falë Infantinos, i cili edhe këtë herë u tregua i gatshëm të bënte kompromis me presidentin amerikan.