Shtetet e Bashkuara, Danimarka dhe Grenlanda kanë arritur një marrëveshje që i hap rrugë zgjerimit të pranisë ushtarake amerikane në ishull. Sipas presidentit Donald Trump, marrëveshja synon gjithashtu të pengojë kundërshtarët e SHBA-së të ndërtojnë baza apo të kryejnë investime të ndjeshme në Grenlandë. Trump deklaroi se marrëveshja nuk ka afat skadimi dhe se SHBA-ja do të ketë mundësi të ndërmarrë masat e nevojshme për sigurinë e Grenlandës dhe të Amerikës.
“Kjo është një ëndërr e bërë realitet për Shtetet e Bashkuara”, shkroi Trump në Truth Social, duke paralajmëruar se së shpejti do të vendoset një prani e konsiderueshme ushtarake amerikane në ishull.
SHBA-ja ka prej dekadash të drejta të gjera ushtarake në Grenlandë, bazuar në një marrëveshje të vitit 1951. Aktualisht, në veriperëndim të ishullit ndodhet edhe një bazë e Forcave Hapësinore amerikane. Qeveria daneze tha se marrëveshja do të forcojë sigurinë në Atlantikun e Veriut dhe Arktik. Kryeministri i Grenlandës, Jens-Frederik Nielsen, deklaroi se ajo njeh interesat e ishullit dhe rolin e tij në bashkëpunimin ndërkombëtar.
Megjithatë, mbetet e paqartë nëse marrëveshja parashikon ndërtimin e bazave të reja amerikane dhe çfarë kompetencash shtesë do të ketë Uashingtoni. Sekretari amerikan i Shtetit, Marco Rubio, tha se marrëveshja adreson në mënyrë afatgjatë shqetësimet e sigurisë së SHBA-së dhe synon të mbajë kundërshtarët strategjikë jashtë Grenlandës dhe zonave përreth saj.
