Paolo Zampolli, i dërguari special i Presidentit Trump për Partneritetet Globale, i cili vizitoi disa javë më parë Shqipërinë është shkarkuar nga Departamenti Amerikan i Shtetit.
Gjatë qëndrimit në vendin tonë ai zhvilloi një seri takimesh me liderë fetarë dhe përfaqësues të rëndësishëm të politikës shqiptare.
Në shtator ai vizitoi Kryegjyshatën Botërore Bektashiane, u takua me eksponentë të mazhorancës dhe qeverisë shqiptare si dhe zhvilloi takime edhe me zyrtarë të opozitës.
Zampolli është shkarkuar tashmë nga detyrat në Departamentin Amerikan të Shtetit, duke thënë se statusi i tij “si i dërguar është ndërprerë dhe ai nuk është më punonjës qeveritar”.
Kur iu kërkua të komentonte për shkarkimin e tij, Zampolli tha në një deklaratë: “Shërbimi ndaj [Presidentit Donald Trump ] dhe Shteteve të Bashkuara ka qenë nderi më i madh i jetës sime. Jam thellësisht mirënjohës ndaj Presidentit Trump, Sekretarit Rubio dhe të gjithë ekipit. Tani është koha për kapitullin tjetër – kthimin te biznesi, ndërtimin e marrëdhënieve dhe mbylljen e marrëveshjeve”, shtoi ai.
Ai tha se Trump i kishte thënë: “Pse do të punosh në qeveri kur mund të mbyllësh të gjitha këto marrëveshje?”
Në një intervistë të shkurtër telefonike, ai tha se nuk kishte asnjë surprizë absolute që u pushua nga puna pas artikullit.
Zampolli, një mik personal i Trump , u shkarkua disa orë pasi POLITICO publikoi të enjten një artikull që tregonte sherrin disamujor që ai kishte pasur përmes email-eve me Zëvendës-Sekretarin e Shtetit Christopher Landau.
Të dy zyrtarët ishin në sherr për autoritetin dhe zinxhirin e komandës. Landau përpiqej ta mbante Zampollin të përqendruar në rolin e tij si i dërguar kulturor. Sherri ishte bërë i dukshëm jo vetëm për shkak të sulmeve personale dhe akuzave për shpifje, por edhe sepse më shumë se një duzinë zyrtarësh qeveritarë ishin përfshirë në disa nga zinxhirët e email-eve. Zampolli doli publikisht në dy intervista për Politico, në të cilat ai e sulmoi Landaun dhe tha se ai e "kishte sulmuar që nga dita e parë" dhe "çdo gjë që bëja, ai u përpoq ta shkatërronte".
Në vitet 1990, Zampolli kishte punuar si agjent modelesh. Ai përfaqësoi Melania Trump dhe e prezantoi atë me Donald Trump. Zampolli u emërua në bordin e Qendrës Kennedy gjatë administratës së parë Trump dhe presidenti e emëroi atë përfaqësues special të SHBA-së për partneritete globale në administratën e tij të dytë. Në këtë rol, Zampolli duhej të përfaqësonte Shtetet e Bashkuara në ngjarje kulturore globale dhe të formonte partneritete kulturore në të gjithë botën.
Por, sipas emaileve të siguruara nga POLITICO, Zampolli u largua shumë nga detyrat e tij dhe u takua me zyrtarë të huaj për të diskutuar çështje jo-kulturore.
Në qershor, Zampolli e akuzoi Landaun përmes email-eve se ishte burimi i një artikulli në “The New York Times”. Edhe pse Zampolli nuk e specifikoi artikullin, detajet korrespondojnë me një artikull që raportonte se Zampolli i kishte kërkuar Zyrës së Imigracionit dhe Doganave të deportonte në Brazil, Amanda Ungaro, nënën e djalit të tij, në mënyrë që ai të merrte kujdestarinë e tij.
Zampolli mohoi se i kishte kërkuar ICE këtë gjë. Landau mohoi se kishte nxjerrë informacion te NYT. / Përgatiti LAPSI.al
