Carlo Ancelotti, pas refuzimit të ofertës së Italisë, ka përcaktuar drejtimin e ri të Kombëtares braziliane. Pas rikthimit në Brazil, trajneri zhvilloi një takim me drejtuesit dhe stafin teknik të CBF-së për të planifikuar ciklin e ri të Seleçaos drejt Kupës së Botës 2030. Tekniku italian konfirmoi se projekti do të bazohet mbi një rinovim të rëndësishëm të skuadrës, duke u dhënë hapësirë talenteve të rinj, pa hequr dorë plotësisht nga disa prej lojtarëve me përvojë që ende mund të japin kontribut.
Takimi me Federatën shërbeu edhe për të përcaktuar programin e muajve të ardhshëm, përfshirë grumbullimet e shtatorit dhe nëntorit, organizimin e ndeshjeve miqësore dhe rrugën drejt kompeticioneve të ardhshme.
Brazili nis ciklin e ri drejt Botërorit 2030
Ditët e fundit emri i teknikut Ancelotti u përmend edhe për stolin e Italisë, pas zbulimit të kontakteve që kishte pasur me presidentin Malagò, Maldinin dhe Leonardon, përpara largimit të dy të fundit nga FIGC në mes të çështjes “Pirlo”. Mundësitë që Ancelotti të merrte drejtimin e Italisë kanë qenë gjithmonë shumë të vogla, ndërsa tentativa e ish-drejtuesve të Milanit kishte surprizuar opinionin publik.
Pas disa ditësh pushim, Ancelotti është rikthyer në punë duke analizuar paraqitjen zhgënjyese të Brazilit në Botërorin e fundit. CBF dhe trajneri diskutuan gjithashtu për një bashkëpunim më të ngushtë mes kombëtares A dhe përfaqësueseve të moshave, me synimin për të krijuar vazhdimësi teknike dhe për të zhvilluar talentet më premtuese për Botërorët e ardhshëm U17 dhe ciklin olimpik.
I lidhur me Federatën braziliane me kontratë deri në vitin 2030, Ancelotti do të ndjekë nga afër kampionatin brazilian dhe Kupën e Brazilit, me synimin për të zgjeruar listën e futbollistëve të monitoruar dhe për të ndërtuar një Brazil më konkurrues pas zhgënjimit në Botërorin 2026.
