Ndalimit të ish-shefes së SHISH, i kanë bërë jehonë edhe mediat greke. Protothema shkruan se ky është skandali më i fundit i korrupsionit që godet qeverinë e kryeministrit Edi Rama, i cili është përballur me një sfidë prej muajsh për shkak të një plani të diskutueshëm për një kompleks turistik në pjesën jugore të vendit, i mbështetur nga dhëndri i Donald Trump, Jared Kushner.
Në artikull thuhet se Hyseni ka drejtuar Shërbimin Shtetëror të Inteligjencës së Shqipërisë (SHISH) që nga viti 2023. Protothema thekson gjithashtu se emërimi i saj shkaktoi polemika në Shqipëri për shkak të shtetësisë së saj kosovare dhe rolit të saj të mëparshëm si zëvendëskryetare e shërbimeve të inteligjencës së Kosovës, nga i cili u shkarkua.
Po ashtu gazeta greke thekson se ish-shefi i policisë Ilir Proda, i cili u shkarkua nga detyra në fillim të këtij viti, u paraqit në SPAK si pjesë e të njëjtit rast. Në fund të artikullit, thuhet se hetimi po synon gjithashtu Ermal Beqirin – i cili u arrestua në Francë në fund të gushtit dhe biznesmenin Ergys Agasi, i cili u arrestua më 26 gusht.
Artikulli i Protothema:
Prokurorët e ngarkuar me trajtimin e rasteve të korrupsionit në Shqipëri lëshuan sot një urdhër arresti për kreun e shërbimeve shtetërore të inteligjencës së vendit, Vlora Hyseni, si pjesë e një hetimi për korrupsion që përfshin edhe një zyrtar të lartë të policisë.
Zyra e Prokurorisë së Posaçme kundër Korrupsionit dhe Krimit të Organizuar (SPAK) tha në një deklaratë se kishte urdhëruar pezullimin nga detyra dhe arrestin shtëpiak të Hysenit, pasi dyshohet se ajo ka zbuluar informacione të klasifikuara. Sipas mediave lokale, Vlora Hyseni nuk ndodhet aktualisht në vend.
Ky është skandali më i fundit i korrupsionit që godet qeverinë e kryeministrit Edi Rama, i cili është përballur me një sfidë prej muajsh për shkak të një plani të diskutueshëm për një kompleks turistik në pjesën jugore të vendit, i mbështetur nga dhëndri i Donald Trump, Jared Kushner. Sipas deklaratës së prokurorisë, u arrestua edhe një zyrtar i hetimeve penale.
Hyseni ka drejtuar Shërbimin Shtetëror të Inteligjencës së Shqipërisë (SHISH) që nga viti 2023. Emërimi i saj shkaktoi polemika në Shqipëri për shkak të shtetësisë së saj kosovare dhe rolit të saj të mëparshëm si zëvendëskryetare e shërbimeve të inteligjencës së Kosovës, nga i cili u shkarkua.
Ish-shefi i policisë Ilir Proda, i cili u shkarkua nga detyra në fillim të këtij viti, u paraqit gjithashtu para SPAK këtë mëngjes si pjesë e të njëjtit rast. Hetimi po synon gjithashtu Ermal Bekirin i cili u arrestua në Francë në fund të gushtit – dhe biznesmenin Ergis Agasi, i cili u arrestua më 26 gusht.
