Një 72-vjeçar ka humbur jetën pasi banesa e tij u përfshi nga flakët pasditen e së shtunës në lagjen nr. 15 të Korçës. Viktima, Urim Hysolli, ndodhej brenda apartamentit në momentin e zjarrit. Sipas dyshimeve paraprake, ai ka humbur jetën nga asfiksia për shkak të tymit.
Banorët e zonës thanë se 72-vjeçari vuante nga varësia ndaj alkoolit dhe ishte rikthyer prej pak javësh në banesën e tij. Sipas tyre, disa ditë më parë ai kishte tentuar t'i vinte flakën apartamentit në gjendje të dehur, por zjarri ishte shuar në kohë.
Në vendngjarje ndërhynë forcat zjarrfikëse dhe policia, të cilat evakuuan banorët e pallatit dhe vunë nën kontroll flakët. Grupi hetimor, nën drejtimin e Prokurorisë, po punon për të zbardhur shkaqet dhe rrethanat e zjarrit.
