Ditmir Bushati godet fort Ramën në "Il Foglio": Të bazohesh në teori konspirative do të thotë të luash me zjarrin"

"Të mohosh zemërimin popullor që ka pushtuar rrugët, ka një kosto të lartë". Ky ka qenë mesazhi që ish ministri i jashtëm i socialistëve Ditmir Bushati i ka dhënë gazetës italiane Il Foglio. Në një shkrim të gjatë nga Tirana të titulluar revolta e Falamingove gazetari Nicola Mirenzi ka qëmtuar arsyen se përse ata që kanë dalë në rrugë po kërkojnë dorëheqjen e Edi Ramës dhe largimin e të gjithë klasës së vjetër politike. Ai ka përshkruar historinë se për shumë vite kryeministri aktual ka qenë i preferuari i perëndimit si një politikan modern që po e afronte vendin e tij me BE-në. Por fakti se tani po kërkohet largimi i tij e ka nxehur atë.

"Edhe për këtë arsye, Edi Rama reagoi ndaj protestës me bezdi. Në fillim e injoroi, ashtu siç bënë edhe shumë media. Më pas foli për ndërhyrje të huaja. Shqiptarët, sipas tij, po përdoreshin si "mish për top" në një fushatë globale kundër Trumpit. Më pas tha se ishin viktima të një hakmarrjeje nga Irani, pasi qeveria shqiptare kishte ofruar mbrojtje për një grup politik kundër ajatollahëve. Deri sa arriti te pista greke: Greqia, sipas tij, po nxiste revoltën për t'i marrë Shqipërisë turistët.
Kur u intervistua nga Financial Times, Rama iu përgjigj protestuesve me fjalë vulgare. "Njerëzit thonë se unë jam kreu i gjithë kësaj. Unë u them: 'shkoni në djall' (fjalë për fjalë: 'shkoni q***'). Kaq e thjeshtë. Nuk më takon mua të provoj se nuk jam Kumbari; u takon atyre të provojnë se jam."

Pikërisht për të kundërshtuar këtë delir gazetari italian i është drejtuar ish ministrit të jashtëm Bushati, i cili sipas tij i komentoi për Il Foglio me habi këto qëndrime: "Nevojitet një reflektim serioz dhe një veprim konkret politik. Të mohosh realitetin, të tallesh me protestuesit, të polemizosh për numrin e tyre, të ndjekësh teori konspirative duke injoruar thelbin e çështjes – pra zemërimin popullor që ka pushtuar rrugët – do të thotë të luash me zjarrin. Shqipëria meriton më shumë", ka thënë Ditmir Bushati, ashstu sikurse cdo politikan normal që nuk gjendet ën thundërën e debilizimit nga pushteti.

LAPSI.AL