Pas përfundimit të fjalimeve para Kryeministrisë, protestuesit kanë lënë një mbishkrim gjigant në Bulevard, pikërisht përballë zyrës së kryeministrit Edi Rama. Ata shkruan fjalën "RESIGN!", duke përsëritur kërkesën që ka shoqëruar protestën që prej ditës së parë: dorëheqjen e kryeministrit Edi Rama.
Sipas organizatorëve, mesazhi simbolizon vendosmërinë e qytetarëve për të vijuar protestën deri në realizimin e kërkesave të tyre. Ata kanë theksuar se dorëheqja e kryeministrit mbetet një kërkesë e panegociueshme. Gjatë tubimeve, qytetarët kanë ngritur shqetësime për korrupsionin, keqqeverisjen, koston e jetesës dhe mungesën e transparencës, ndërsa kërkojnë edhe krijimin e një qeverie teknike që, sipas tyre, do të garantojë zgjedhje të lira dhe të ndershme.
Pas vendosjes së mbishkrimit, protestuesit vijuan marshimin në rrugët e kryeqytetit, nën thirrjet "Rama, jep dorëheqjen", "Shqipëria kërkon revolucion", "Pa rini nuk ka Shqipëri" dhe "Ju erdhi fundi". Organizatorët kanë bërë të qartë se mobilizimi do të vazhdojë edhe në ditët në vijim.
