Aktori Ethan Slater është shfaqur për herë të parë në publik pas lajmeve për ndarjen e tij nga këngëtarja dhe aktorja Ariana Grande.
Ethan mori pjesë i vetëm në tapetin e kuq të shfaqjes “Romeo & Juliet” në kuadër të eventit Shakespeare in the Park, që u mbajt në teatrin Delacorte në Central Park të New York-ut. Slater u shfaq i buzëqeshur dhe i qetë, i veshur me pantallona të zeza, një bluzë të bardhë dhe atlete në të njëjtën ngjyrë.
Dalja e tij publike vjen vetëm pak ditë pasi mediat amerikane konfirmuan se ai dhe Ariana Grande i kanë dhënë fund lidhjes së tyre disa muaj më parë.
Sipas një burimi pranë ish-çiftit, ndarja ka ndodhur në mënyrë miqësore.
“Ariana dhe Ethan u ndanë disa muaj më parë, por kanë mbetur miq dhe vazhdojnë të kenë respekt e admirim për njëri-tjetrin. Nuk ishte një vendim i lehtë, por e kuptuan se funksiononin më mirë si miq sesa në një lidhje romantike,” tha burimi.
Ndërkohë, Ariana Grande thuhet se është e fokusuar te projektet e saj të ardhshme, përfshirë turneun “Eternal Sunshine” dhe publikimin e albumit të ri “Petal”.
Mungesa e Slater në aktivitetet e fundit të Grandes kishte nxitur prej kohësh spekulime për një krizë në marrëdhënien e tyre. Gjithashtu, dyshja nuk u shfaq së bashku gjatë promovimit të filmit “Wicked: For Good”, ndërsa aktori shmangu pyetjet për jetën e tij private në intervistat e fundit.
Edhe pse nuk janë parë së bashku prej muajsh, Slater së fundmi tregoi se raportet mes tyre mbeten të mira, duke pëlqyer në rrjetet sociale disa fotografi nga performancat e Grandes.
Ariana Grande dhe Ethan Slater u njohën në vitin 2022 gjatë xhirimeve të filmit “Wicked”. Në atë kohë, të dy ishin të martuar me partnerët e tyre përkatës.
Në vitin 2023, Grande u nda nga bashkëshorti i saj Dalton Gomez, ndërsa Slater nisi procedurat e divorcit nga Lilly Jay, me të cilën ka një djalë.
