Eurodeputetja Cristina Guarda do të udhëtojë drejt Tiranës për t’iu bashkuar protestave qytetare, të cilat prej 26 ditësh zhvillohen në mënyrë paqësore me kërkesën për dorëheqjen e kryeministrit Edi Rama dhe largimin e qeverisë. Në një video të publikuar në rrjetet sociale, Guarda vlerëson mobilizimin e protestuesve. Ajo thotë se mënyra paqësore e reagimit të qytetarëve shqiptarë përbën një shembull edhe për Europën. Sipas saj, institucionet europiane duhet të dëgjojnë zërin e protestuesve.
“Pas pak ditësh do të jem në Shqipëri, në shesh me ju. Falë edhe amendamentit të propozuar nga ne, ‘Të Gjelbrit’, Europa i ka bërë të qartë Edi Ramës se nuk mund të autorizohen resorte ekstra luksoze pa vlerësime mjedisore dhe pa respektuar standardet europiane. Së bashku me delegacionin e ‘Të Gjelbërve’ në PE do të takohemi me përfaqësues të shoqërisë civile, organizatave joqeveritare dhe qytetarëve, të cilët prej javësh po zhvillojnë protesta paqësore. Ky është një mobilizim i paprecedentë që kërkon më shumë demokraci, transparencë dhe të drejta. Dua të jem aty me ju. EUropa duhet t’ju dëgjojë. Shihemi në shesh”, deklaroi Guarda.
