Seanca ku Kuvendi miratoi reformën e re territoriale u mbyll pas mesnate mes tensioneve dhe përplasjeve të forta në sallë. Me 85 vota pro, mazhoranca kaloi ndarjen e re administrative, e cila ul numrin e bashkive nga 61 në 46. Votimi u shoqërua nga skena kaotike. Kryeministri Edi Rama mbërriti në Kuvend pak para momentit vendimtar, ndërsa deputetët e opozitës reaguan duke bllokuar foltoren dhe hedhur në drejtim të tij shishe uji, vezë dhe sende të tjera.
Tensionet vijuan edhe me mbërritjen e Belinda Ballukut në sallë. Kreu i grupit parlamentar të PD-së, Gazment Bardhi, hodhi bidonë uji në drejtim të saj, ndërsa përplasjet verbale dhe zhurma dominuan minutat para votimit.
Pas miratimit të reformës, Rama u largua nga salla duke buzëqeshur, i shoqëruar nga ministri i Brendshëm Ervin Demo dhe kryetari i Kuvendit, Niko Peleshi.
Pavarësisht rezervave të shprehura më herët, Erion Braçe, Elisa Spiropali dhe Vullnet Sinaj votuan në fund pro reformës territoriale.
