Një 51-vjeçar është arrestuar në flagrancë në Tiranë, pasi u kap me 811 gramë lëndë të dyshuar narkotike kokainë.
Arrestimi u bë nga Komisariati i Policisë Nr. 4, në bashkëpunim me Seksionin për Hetimin e Narkotikëve, në kuadër të fazës së dytë të operacionit policor të koduar “Zonat”.
Sipas policisë, i arrestuari është shtetasi F. B., 51 vjeç. Ai u lokalizua dhe u ndalua në një lokal në zonën e Freskut, pas informacioneve të siguruara në rrugë operative dhe pas veprimeve hetimore.
Gjatë kontrollit të çantës që mbante me vete, policia gjeti dhe sekuestroi 811 gramë lëndë të dyshuar narkotike të llojit kokainë.
Nga hetimet paraprake dyshohet se 51-vjeçari do të furnizonte persona të tjerë me këtë sasi droge, me qëllim ndarjen dhe shpërndarjen e saj në doza në zona të ndryshme të kryeqytetit.
Policia bën me dije se hetimet vijojnë në bashkëpunim me Prokurorinë, për dokumentimin e plotë të aktivitetit kriminal, si dhe për identifikimin dhe kapjen e personave të tjerë të përfshirë.
Faza e parë e operacionit “Zonat” u finalizua një ditë më parë nga Sektori për Hetimin e Narkotikëve në DVP Tiranë, ku u sekuestruan mbi 200 gramë kokainë e dyshuar dhe u arrestua poseduesi i saj.
Materialet procedurale i kaluan Prokurorisë për veprime të mëtejshme.
