Gerry Cardinale ka nisur revolucionin, por në shtëpinë e Milanit vazhdon protesta e tifozërisë së organizuar. Gjatë natës, në fakt, u shfaqën pankarta të reja pranë San Siro: në shënjestër, edhe një herë, Zlatan Ibrahimovic, i cili do të jetë njeriu i fortë në epokën e re. “Ibra e keqja absolute, Allegri dhe Tare të vetmit burra të vërtetë”, lexohet: ish-drejtori sportiv dhe ish-trajneri mbrohen edhe një herë, siç kishte ndodhur tashmë në manifestimin e zhvilluar përpara Milan-Atalanta më 10 maj.
Të dy, megjithatë, u liruan nga detyra gjatë ditës së djeshme. Vazhdon gjithashtu fushata kundër Cardinale dhe nuk kursehen as Maignan me shokë, të vërshëllyer fuqishëm pas humbjes me Cagliarin: “Lojtarë dhe klub, të gjithë fajtorë”. Me pak fjalë, për të rikthyer qetësinë do të duhen kohë dhe rezultate.
Ndërkohë, një detaj aspak banal ka goditur të gjithë në mbrëmjen e revolucionit: asnjë futbollist nuk e ka përshëndetur Massimiliano Allegri-n në rrjetet sociale pas shkarkimit. As Matteo Gabbia, Mike Maignan apo vetë Adrian Rabiot, besniku i trajnerit toskan. E njëjta gjë vlen edhe për Modric, i cili vetëm pak ditë më parë, pikërisht në Sportmediaset, kishte përdorur fjalë plot vlerësim për atë që konsiderohet kandidati kryesor për t’u bërë pasardhësi i Conte-s te Napoli.
