Policia ka dhënë detaje për konfliktin e dhunshëm të ndodhur rreth orë 3.20 të mëngjesit të sotëm në rrugën "Butrinti" në Sarandë. Sipas uniformave blu sherri kishte shpërthyer mes rojeve të sigurisë së një lokali dhe disa personave të tjerë duke mos njoftuar policinë.
Aty po kalonte Shefi i Hetimit të Krimeve në Policinë e Sarandës, Mateo Bakalli që ka ndërhyrë për të shuar përplasjen, por edhe pse është prezantuar, edhe ndaj tij është ushtruar dhunë fizike. Në këtë situatë Bakalli ka kërkuan ndihmën e forcave të tjera të policisë.
“Pas rreth 1 minute, kanë shkuar në ndihmë shërbimet e Forcës së Posaçme “Shqiponja” dhe Forcat Kombëtare të Sigurisë, të cilat kanë neutralizuar përshkallëzimin e konfliktit dhe kanë shoqëruar disa persona që janë gjendur të pranishëm në konflikt”, - thuhet në njoftim.
Në pranga ranë administratori i lokalit, 4 roje sigurie, mes tyre një ushtarak dhe një taksist, ndërsa një tjetër roje po kërkohet nga policia.
Gjithashtu janë pezulluar menjëherë nga detyra edhe dy efektivë të policisë, të cilët punonin pa leje si roje në të njëjtin lokal, pasi nuk njoftuan shërbimet operative dhe nuk ndërhynë për të parandaluar dhunën. Policia ka nisur hetimet mbi rastin dhe po heton më shumë mbi shkaqet dhe rrethanat e këtij konflikti të dhunshëm. ©LAPSI.al
