Kur FIFA njoftoi në 2018-ën se Kupa e Botës në 2026-ën do të mbahej në SHBA, Kanada dhe Meksikë ai që shprehu pakënaqësinë i pari ishte ikona e futbollit argjentinas Diego Armando Maradona.
Sipas tij, nuk mund të shkojë një event i tillë në vende që nuk kanë një kulturë të vërtetë të futbollit.
“Nuk më pëlqen”, tha në atë kohë Maradona për mediatn vendase “Telesur”. “Meksika nuk e meriton. Meksikanët luajnë kundër Brazilit ose Gjermanisë… dhe “bum”, eliminohen”.
Maradona vuri në dukje në atë kohë edhe mungesën e interesit për futbollin në Amerikën e Veriut. Ai theksoi se para Kupës së Botës 1994, SHBA-të propozuan ndarjen e ndeshjeve në 4 pjesë për të pasur më shumë kohë transmetimi për reklamat.
“Nuk kanë pasion. Kanadezët mund të jenë skiatorë të mirë, dhe amerikanët donin të kishin katër pjesë nga 25 minuta për reklamat” – tha Maradona.
Dhe duket se ka pasur të drejtë. Për herë të parë në këtë Botëror, FIFA ka lejuar atë që quhet “Hydration break”, apo “Ndërprerja e hidratimit”. Bëhet fjalë për ndërprerje 3-minutëshe në mes të çdo pjesë ku lojtarët mund të freskohen paksa ndërsa në ekranet e stadiumit dhe të TV-ve vërshojnë reklamat.
Diego Maradona ndërroi jetë më 25 nëntor 2020, pas një arresti kardiak në moshën 60-vjeçare. ©LAPSI.al
