Dhjetëra qytetarë iu bashkuan këtë të hënë një proteste në Tiranë kundër projektit të investimit në zonën e Zvërnecit, në Vlorë. Tubimi nisi në sheshin “Skënderbej”, ndërsa më pas protestuesit marshuan drejt Kryeministrisë.
Gjatë marshimit, pjesëmarrësit zhvilluan një aksion simbolik pranë Ministrisë së Brendshme, duke vendosur tela me gjemba për të kundërshtuar rrethimin e një pjese të zonës së Zvërnecit gjatë ditëve të fundit. Protestuesit iu referuan edhe incidenteve të raportuara mes qytetarëve dhe përfaqësuesve të sigurisë private të kompanisë që pritet të realizojë investimin.
Përgjatë gjithë marshimit dhe gjatë qëndrimit para Kryeministrisë, dëgjoheshin thirrje kundër klasës politike. Një nga sloganet më të përsëritura ishte “Rama në burg, Berisha në burg”, duke shprehur pakënaqësi si ndaj qeverisë ashtu edhe ndaj opozitës.
Në protestë morën pjesë kryesisht të rinj, të cilët kërkuan më shumë transparencë për projektin në Zvërnec dhe shprehën pakënaqësinë e tyre ndaj situatës politike në vend.
