Protesta kombëtare e ditës së 35-të para Kryeministrisë është shoqëruar me një tjetër akt simbolik. Pas tortës prej betoni dhe arkivolit simbolik, protestuesit kanë sjellë në bulevard edhe një bust që, sipas tyre, përfaqësonte kryeministrin Edi Rama. Mbi të ishte vendosur mbishkrimi “Busti i fundit i diktaturës”. Busti u rrëzua mes brohoritjeve dhe duartrokitjeve të mijëra pjesëmarrësve.
Sipas organizatorëve, ky veprim ishte një referencë simbolike ndaj rrëzimit të bustit të diktatorit Enver Hoxha, duke e paraqitur si shenjë të përfundimit të asaj që ata e konsiderojnë një epokë politike. Tubimi, që organizatorët e cilësojnë si më masivin që nga nisja e lëvizjes qytetare 35 ditë më parë, është shoqëruar me thirrjet “Rama në burg, Berisha në burg”, “Revolucion”, “Shqipëri e re”, “Dorëheqje” dhe “Lironi çunat”, në mbështetje të protestuesve të arrestuar pas përplasjeve me policinë.
