Kryeministri Edi Rama ka bërë një reagim në rrjetet sociale lidhur me protestën e zhvilluar dje në zonën e Zvërnecit, duke ironizuar protestuesit dhe duke u bërë thirrje që gjatë vizitave në zonë të mos dëmtojnë mjedisin që pretendojnë se po mbrojnë.
Në postimin e tij në rrjetet sociale, Rama u bëri thirrje “revolucionarëve”, siç i quajti ai, duke i ftuar që herën tjetër, kur të shkojnë për të mbrojtur flamingot, të mos hyjnë me automjete në zonën bregdetare.
Postimi i Ramës:
MIRËMËNGJES dhe me një lutje të përulur revolucionarëve, që kur të shkojnë herë tjetër në atë breg për t’u qarë hallin flamingove, të mos i bëjnë për të qarë duke ua zhvirgjëruar plazhin me makinat e tyre - se do kujtojnë të shkretët zogj se filloi ndërtimi i parkimit aty, e do marrin arratinë siç e kishin marrë përpara moratoriumit 10 vjeçar të gjuetisë - po t’i lënë rrotat tek rruga automobilistike e të ecin si flamingo deri tek buza e detit pa u trembur nga papastërtitë, por mundësisht pa i shtuar ato si dje që i kishin lënë mbrapa kanoçet e birrës, ju uroj të gjithëve një të diel të qetë.
