Kryeministri Edi Rama ka kritikuar Shtetet e Bashkuara për mënyrën se si është trajtuar ish-presidenti i Kosovës, Hashim Thaçi, duke deklaruar se ai është “tradhtuar” nga vendi që e kishte mbështetur Kosovën gjatë luftës.
Gjatë fjalës së tij në Këshillin për Marrëdhëniet Shqiptaro-Amerikane në New York, Rama tha se Thaçi nuk ndodhet aty për shkak të asaj që ai e cilësoi si një “farsë” që, sipas tij, nuk duhej të kishte nisur.
“Thaçi nuk është sot këtu sepse ky vend e tradhtoi. Sepse edhe pse gjenerali Clark dhe miq të shkëlqyer bënë më të mirën, ky vend nuk bëri më të mirën për George Washingtonin e Kosovës”, u shpreh Rama referuar asaj që ndodhi në Hagë në Gjykatën Speciale.
Kryeministri sqaroi se me termin “tradhtuar” nuk nënkuptonte se shqiptarët janë të barabartë në peshë me Shtetet e Bashkuara, por se marrëdhënia e gjatë mes shqiptarëve dhe SHBA-së e bën atë të ndihet i zhgënjyer nga mënyra se si është trajtuar çështja e Thaçit.
“Askush nuk duhet të më keqkuptojë sepse kur them tradhtuar e kam fjalën që jemi të gjithë shumë të vegjël dhe së bashku nuk jemi të mëdhenj. Por kemi kremtuar gjithmonë faktin që si shqiptarë jemi miq me SHBA, me më të mëdhenjtë e më të fortët, ndaj ndihem i tradhtuar”, tha Rama.
Ai shtoi se, sipas tij, Shtetet e Bashkuara mund të kishin bërë më shumë për të mos lejuar nisjen e procesit gjyqësor ndaj ish-presidentit të Kosovës dhe ish-krerëve të UÇK-së.
“Jam i sigurt që ky vend mund të bënte më shumë duke mos lejuar që kjo farsë të niste. Mirënjohës për gjithçka keni bërë në kapacitetin personal tuaj”, deklaroi Rama.
Thaçi u dënua më 16 shtator nga Dhomat e Specializuara të Kosovës në Hagë me 25 vite burgim për përgjegjësi penale për krime lufte.
