RENEA ka zbarkuar në Korçë mbrëmjen e sotme.
Mësohet se vetëm pak minuta më parë, forca të shumta policie si edhe RENEA kanë shkuar pranë banesës së autorit. Po ashtu janë ushtruar kontrolle në varrezat e qytetit. Dyshohet se autori mund të jetë fshehur në këtë zonë.
Johan Zuko nuk është arritur të gjendet atje nga forcat e ndërhyrjes së shpejtë.
Policia ka dhënë informacionin paraprak për vrasjen e ndodhur pasditen e sotme në Korçë, ku humbi jetën 20-vjeçari Johan Zuko.
Sipas Policisë, ngjarja ka ndodhur rreth orës 16:30, në rrugën “Viktor Eftimiu”, në lagjen nr. 15, ku një konflikt mes disa personave është përshkallëzuar deri në përdorimin e armës së zjarrit.
Ndërkohë, tre persona të dyshuar si të përfshirë në konflikt janë shoqëruar në Komisariat, ku do t’u nënshtrohen veprimeve të mëtejshme procedurale.
Viktima dhe autori i dyshuar janë përfshirë në një konflikt pak para ngjarjes. Zuko dyshohet se ka pasur me vete edhe një thikë. Thika është gjetur në dorën e viktimës pas ngjarjes dhe është sekuestruar nga grupi hetimor si provë materiale.
Viktima ka marrë vetëm një plagë në pjesën e poshtme të shpatullës, plumb i cili i ka dalë nga ana tjetër. Autori e ka qëlluar nga pas viktimën, teksa 20 vjeçari ngjiste shkallët, në kat të tretë.
Mësohet se 20-vjeçari ishte mobilizuar si ushtar prej më shumë se një viti dhe vetëm dy muaj më parë kishte lënë detyrën pasi do shkonte tek i vëllai në Angli.
Autori i dyshuar është larguar nga vendngjarja dhe vijon të jetë në arrati. Policia ka nisur kërkimet për kapjen e tij, ndërsa hetuesit po punojnë për të dokumentuar dinamikën e konfliktit dhe për të zbardhur rrethanat e plota të vrasjes.
