Lajmi për pezullimin nga detyra dhe për të vendosur në masën e “arrestit shtëpiak” drejtoreshën e SHISH, Vlora Hyseni ka marrë vëmendje të gjerë ndërkombëtare.
Agjencia prestigjioze e lajmeve Reuters shkruan se një gjykatë shqiptare ka pezulluar shefen e inteligjencës së vendit dhe ka urdhëruar arrestin e saj shtëpiak me dyshimin për zbulimin e informacionit të klasifikuar, si pjesë e një hetimi më të gjerë për korrupsion, duke cituar edhe prokurorinë speciale.
“Vlora Hyseni, e cila është me origjinë nga Kosova, ka shërbyer si drejtuese e shërbimit të inteligjencës SHISH që nga viti 2023. Më parë, ajo shërbeu si zëvendës-shefe e inteligjencës në Kosovë.
Prokurorët thanë se Hyseni dyshohej për zbulimin e informacionit të klasifikuar personave të paautorizuar në lidhje me një rast korrupsioni në Agjencinë Kombëtare për Shoqërinë e Informacionit (AKSHI), e cila menaxhon shërbimet publike digjitale dhe infrastrukturën e IT-së në Shqipëri. Zyra e prokurorisë speciale, e njohur si SPAK, e ka ndjekur prej kohësh çështjen. Hyseni nuk mund të kontaktohej për koment” – shkruan Reuters.
Sipas agjencisë së lajmeve shumë zyrtarë shtetërorë dhe biznesmenë janë arrestuar ose po hetohen për keqpërdorim të parave publike në AKSHI.
“SPAK, i cili synon korrupsionin dhe krimin e organizuar, tha se masat kundër Hysenit u miratuan nga një gjykatë antikorrupsion për të lejuar hetime të mëtejshme. Kryeministri Edi Rama, i cili ndodhet në Nju Jork për Asamblenë e Përgjithshme të Kombeve të Bashkuara, tha se e kishte shkarkuar tashmë Hysenin nga detyrat e saj dhe, në konsultim me presidentin, do të emëronte një drejtuese të re të agjencisë së inteligjencës” – shkruan Reuters.
“Të gjithë janë të pafajshëm derisa të jepet një vendim i formës së prerë i gjykatës, por askush nuk është mbi ligjin”, - shkroi Rama në X.
Sipas Reuters, ky veprim është një tjetër pengesë për qeverinë e Ramës. Në shkurt, Rama shkarkoi zëvendëskryeministren e tij Belinda Balluku pasi u ngritën akuza për korrupsion kundër saj. Parlamenti më vonë refuzoi t'i hiqte imunitetin për të lejuar arrestimin e saj. Balluku i mohoi akuzat.
“Zyrtarët e Bashkimit Evropian i kanë thënë Reuters se po e shqyrtojnë nga afër mënyrën se si Rama i ka trajtuar rastet e korrupsionit dhe se lufta e Shqipërisë kundër krimit dhe korrupsionit ishte kritike për përpjekjen e vendit ballkanik për t'u bashkuar me bllokun deri në vitin 2030” – shkruan Reuters. ©LAPSI.al
