Protesta qytetare para Kryeministrisë ka hyrë sot në ditën e saj të 11-të radhazi, duke mbledhur sërish qindra qytetarë nga Tirana dhe rrethe të ndryshme të vendit. Fillimisht e nisur si një reagim kundër projektit turistik në Zvërnec, lëvizja është shndërruar në një protestë më të gjerë kundër klasës politike dhe qeverisjes në vend.
Protestuesit janë mbledhur në qendër të kryeqytetit me pankarta dhe slogane kundër qeverisë, duke kërkuar dorëheqjen e kryeministrit Edi Rama dhe ndryshime të thella politike. Ndër thirrjet që janë dëgjuar vazhdimisht gjatë protestës spikat slogani “Rama në burg, Berisha në burg”, një mesazh që synon të shprehë pakënaqësinë jo vetëm ndaj mazhorancës, por edhe ndaj opozitës tradicionale.
Organizatorët kanë deklaruar se protestat do të vijojnë edhe në ditët në vijim, duke këmbëngulur se kërkesat e tyre nuk lidhen me mbështetjen e ndonjë force politike, por me nevojën për një alternativë të re politike dhe më shumë përgjegjshmëri nga drejtuesit e vendit.
