Zjarret në Pukë kanë marrë përmasa të mëdha, ndërsa situata më kritike paraqitet në fshatin Gojan i Madh.
Autoritetet kanë urdhëruar evakuimin e banorëve, ndërsa zjarrëfikësit në terren po punojnë për shuarjen e flakëve që rrezikojnë edhe banesat.
‘Si pasojë e situatës kritike të krijuar nga përhapja e zjarrit masiv në territorin e fshatit Gojan i Madh, Njësia Administrative Gjegjan, dhe rrezikut të drejtpërdrejtë për jetën dhe pronën e banorëve, urdhërohet kryerja e evakuimit të menjëhershëm të banorëve të kësaj zone’, thuhet në njoftimin zyrtar.
Nënkryetari i Bashkisë Pukë u shpreh se situata mbetet tejet problematike në fshatin Gojan i Madh.
Sipas tij, aty është vatra më problematike, por problem është edhe në Gojan i Vogël, por që Ringaj thekson se po monitorohet nga njësitë tokësore, por edhe nga ajri.
‘Shpresojmë të mos kemi dëme në banesa dhe banorë. Janë marra masa për evakuimin e banorëve’, u shpreh ndër të tjera Ringaj.
