Nuk pati kurrë histori në stadiumin e Dallasit. Spanja triumfoi bindshëm ndaj Francës në gjysmëfinalen e Kupës së Botës. Francezët i thanë lamtumirë turneut me një paraqitje zhgënjyese dhe në disa momente katastrofike, pa dhënë asnjëherë ndjesinë se mund të rrezikonin seriozisht kundërshtarin, pikërisht në Ditën e tyre Kombëtare. Ndeshja përfundoi 2-0 për "La Roja", që vazhdon të ëndërrojë një tjetër trofe pas triumfit në Kampionatin Evropian, falë golave të Oyarzabal (22', me penallti) dhe Pedro Porro (58'). Spanja siguron finalen, ku do të përballet me fituesen e sfidës Angli–Argjentinë. Thënia "nuk ka dy pa tre" u bë realitet për Francën. Pas humbjes në gjysmëfinalen e Kampionatit Evropian dhe në finalen e Ligës së Kombeve, "Les Bleus" u mposhtën sërish nga Spanja: 2-0 dhe një tjetër finale për kampionët e Evropës.
Në stadiumin e Dallasit mbizotëroi ekuilibri në minutat e para, me spanjollët që qarkullonin topin me qetësi dhe e lodhnin kundërshtarin me pasime të shumta, ndërsa Franca shfaqej pa ide. Mbappé dhe Dembélé nuk arritën të bënin diferencën, Olise mbeti i zbehtë dhe Spanja kaloi në avantazh falë një episodi. Në minutën e 22’, Digne bëri një gabim të panevojshëm duke ndërhyrë ndaj Yamal, duke shkaktuar penallti. Oyarzabal u tregua i saktë nga pika e bardhë dhe realizoi golin e 1-0, të pestin personal në këtë Kupë Bote. Didier Deschamps humbi Saliba për shkak dëmtimi dhe Franca nuk reagoi siç pritej, madje rrezikoi të pësonte edhe golin e dytë, me Fabian Ruiz që iu afrua shumë rrjetës. Mbappé u pa vetëm në fundin e pjesës së parë, kur Unai Simón e ndali me një dalje vendimtare, duke ruajtur avantazhin 1-0 të Spanjës deri në pushim. Në pjesën e dytë, Deschamps hodhi menjëherë në fushë Manu Koné në vend të Rabiot, i cili ishte ndëshkuar me karton të verdhë, ndërsa më pas aktivizoi edhe Doué për t'i dhënë më shumë ofensivë ekipit.
Megjithatë, ndryshimet nuk sollën efektin e dëshiruar. Në minutën e 58’ erdhi edhe goli i dytë i Spanjës, pas një aksioni spektakolar mes Pedro Porro dhe Dani Olmo. Ky i fundit, edhe pse në rënie, dha një asist të shkëlqyer për Porro, ish-lojtarin e Manchester City dhe Sporting, i cili shënoi për 2-0. Mbappé u përpoq të rikthente në lojë Francën me iniciativat e tij individuale, por ishin spanjollët që vazhduan të krijonin raste. Yamal realizoi edhe një gol tjetër në minutën e 61’, por ai u anulua për pozicion jashtë loje. Minutat e fundit u karakterizuan nga zëvendësimet e zakonshme, me hyrjen në fushë të Cherki dhe Merino, por pa ndryshuar rrjedhën e një ndeshjeje që Spanja e kontrolloi dhe e dominoi nga fillimi në fund. Franca pati vetëm një mundësi të artë, të shpërdoruar nga Doué, i cili gaboi përballë portës pothuajse të boshatisur, duke i dhënë fund ëndrrës së "Les Bleus" në një 14 korrik për t'u harruar. Spanja fitoi me meritë 2-0, nën vështrimin e katër legjendave të futbollit spanjoll – Xavi, Carles Puyol, Sergio Ramos dhe Iker Casillas – dhe tani pret fituesen e ndeshjes Angli–Argjentinë në finalen e Kupës së Botës.
