Drake ka hyrë në histori të klasifikimeve muzikore në Mbretërinë e Bashkuar, duke u bërë artisti i parë që debuton me tre albume studio njëkohësisht në Top 10.
Më 15 maj, Drake publikoi albumin kryesor “Iceman”, si edhe dy projekte surprizë, “Habibti” dhe “Maid of Honour”. Të tre albumet hynë menjëherë në listën zyrtare britanike të albumeve, me “Iceman” që debutoi në vendin e parë, ndërsa “Maid of Honour” dhe “Habibti” u renditën në vendin e gjashtë dhe shtatë.
Kompania zyrtare e klasifikimeve muzikore në Britani konfirmoi se Drake është artisti i parë që arrin një rekord të tillë me tre albume studio në Top 10 në të njëjtën kohë.
“Iceman” shënon albumin e shtatë të Drake që arrin vendin e parë në Mbretërinë e Bashkuar dhe projektin e tij të 17-të që futet në Top 10. Tre albumet përmbajnë gjithsej 43 këngë dhe bashkëpunime me artistë të njohur si Central Cee, 21 Savage dhe PARTYNEXTDOOR.
Pas publikimit, Drake theu edhe rekorde në Spotify, duke u shpallur artisti dhe albumi më i dëgjuar brenda një dite gjatë vitit 2026.
Albumet e reja vijnë pas përplasjes së bujshme me reperin Kendrick Lamar, konflikt që dominoi skenën e hip-hop-it në vitin 2024 dhe që duket se rikthehet sërish në tekstet e projekteve të reja.
“Iceman” fokusohet më shumë te rap-i klasik dhe hip-hop, “Habibti” anon drejt R&B-së, ndërsa “Maid of Honour” sjell influenca të muzikës dance.
Kritikët kanë dhënë vlerësime të ndryshme për projektet. “Rolling Stone” i cilësoi disa pjesë si “plot vetëbesim dhe energji”, ndërsa “The Independent” shkroi se Drake “mbetet armiku më i madh i vetes”.
