Një zhvillim tronditës ka dalë në dritë në lidhje me futbollistin francez Kylian Mbappe, pasi një bandë e rrezikshme po planifikonte të rrëmbente dhjetëra biznesmenë dhe personalitete të famshme nga bota e muzikës dhe sportit, përfshirë edhe superyllin francez të Real Madridit.
Gazeta “Le Parisien” raporton se truri i bandës është një 18-vjeçar i identifikuar si Clément L., i cili ndodhet në paraburgim për krime të mëparshme. Banda e tij qëndron pas një serie sulmesh ndaj shtëpive dhe organizimit të një sërë komplotesh rrëmbimi që kishin ndodhur ose ishin duke u planifikuar nga 11 prilli deri më 19 gusht.
Më 21 gusht, autoritetet hapën një hetim kundër të riut dhe një bashkëpunëtori të tij. Clément L. u ndalua dhe u vendos në izolim, ndërsa bashkëpunëtori i tij i dyshuar u lirua nën mbikëqyrje gjyqësore.
E gjitha filloi mëngjesin e 25 prillit në Neuilly-sur-Seine, kur 3 persona që paraqiteshin si shpërndarës u shfaqën në derën e një rezidence orëndreqësi në Paris me një kuti bosh. Dyqanxhiu dyshoi për një kurth dhe nuk e hapi derën. Të tre ikën, duke e lënë kutinë aty.
Disa ditë më vonë, më 4 maj, dyqani i orëndreqësit u grabit. Dy burra të armatosur me pistoleta hynë në dyqan rreth orës 14:45, shtynë pronarin dhe rrëmbyen 11 orë luksoze me vlerë 150,000 euro, dhe ikën me një skuter. Megjithatë, gjysmë ore më vonë një i dyshuar u arrestua në zonën e Asnières-sur-Seine pasi u përplas me një kamion.
Hetuesit gjetën gjurmë gishtash në pakon bosh ndërsa makina e grabitësve u gjet duke lëvizur në unazën rrugore me targa të falsifikuara që korrespondonin me një targë të vërtetë. Hetimet çuan në zbulimin e dy emrave. Njëri prej tyre ishte ai i Clément L. Ai ishte arrestuar ndërkohë për një rast përdhunimi dhe prostitucioni, si dhe për një rast tjetër vjedhjeje nga banda e organizuar.
Nga qelia e tij, i riu dyshohet se dha urdhra nëpërmjet Snapchat duke përdorur nofkën "Lester Z". Siç thekson media franceze, oficerët e burgut sekuestruan dy telefona celularë të përdorur nga 18-vjeçari. Në to, policia gjeti 26 adresa këngëtarësh, futbollistësh dhe biznesmenësh. Të gjithë kanë një gjë të përbashkët, janë të pasur. Midis tyre ishte një kinez i shitjeve me shumicë, argjendarë, si dhe një turk milioner i shitjes së mishit me shumicë. Adresa që ra në sy ishte ajo e futbollistit 27-vjeçar dhe yllit të Real Madridit, Kylian Mbappe.
Clément L. është me origjinë franko-zvicerane. Dosja e tij penale përfshin dy dënime për vepra penale të lidhura me drogën dhe një për grabitje me dhunë. Babai i tij jeton në Seine-et-Marne dhe nëna e tij në Irlandë. Ai e kishte lënë shkollën ndërsa ndiqte vitin e parë të shkollës profesionale të gatimit. Sa i përket të ardhmes, ai aspiron të vazhdojë studimet dhe të bëhet shef kuzhine.
Gjatë marrjes në pyetje, i riu u rrëfye. Ai pretendon se nuk është truri i bandës dhe se është thjesht një ndërmjetës midis një udhëheqësi misterioz dhe anëtarëve të tjerë që ndërmarrin veprime. "E di që faktet janë serioze", - tha ai në gjykatë. "Por unë jam në izolim, i rrethuar nga të çmendur dhe terroristë, dhe nuk mendoj se kjo do të më bëjë më mirë. Dua vërtet të jem shef kuzhine, ka qenë një ëndërr e imja që kur isha i vogël", shton ai. Gjykata hetuese vendosi ta mbajë në burg, të shkëputur nga bota e jashtme. ©LAPSI.al
