Në Kolumbi, një gjykatë urdhëroi sekuestrimin e një vile në pronësi të ish-portierit të kombëtares së futbollit René Higuita. Sipas gjyqtarëve, prona ishte blerë me para të pista që vinin nga karteli i famëkeq i narkobosit Pablo Escobar, përpara se të kalonte në duart e futbollistit në vitin 1992.
Higuita, i njohur me nofkën “El Loco”, ndodhet në qendër të një hetimi të nisur në vitin 2014 nga prokuroria për të verifikuar origjinën e një shtëpie të blerë në një lagje luksoze të Medellín-it, qyteti i lindjes së ish-futbollistit 59-vjeçar dhe njëherazi qendra e aktiviteteve të paligjshme të Escobarit, i vrarë nga policia në vitin 1993. Në një deklaratë publike, Higuita njoftoi se do të ankimojë vendimin e shkallës së parë të gjykatës së Medellín-it, e cila konfirmoi konfiskimin e pronës së tij në lagjen El Poblado.
Fillimisht, ish-lojtari i Atlético Nacional kishte deklaruar se e kishte blerë ligjërisht shtëpinë e tij në vitet ’90 me fondet e veta, duke mohuar çdo përfshirje me organizata të trafikut të drogës.
