Duke folur për informacionin dhe komentet në portalet online, të ftuarit në emisionin Opinion janë përplasur për etikën dhe jo vetëm. Për të shpjeguar ligjin ekzistues, minsitrja e Inovacionit iu drejtua gazetarit Çim Peka me ironi: "Ja ky ligj është që në 2009-ën, e ka bërë qeveria juaj". Shprehja "qeveria juaj" duket se i dogji Pekës i cili shpërtheu në kundër akuza. "Po çfarë qeveria ime, më thuaj kam pasur ndonjë qeveri unë?" ulërinte gazetari përballë Milena Haritos. "Po vëllai juaj ka qenë zv. ministër i qeverisë së Saliut, për këtë e kisha", u mundua të sqarojë me qetësi Harito. Kaq mjaftoi që Peka t'i hakërrehet ministres duke i kujtuar etikën dhe postin që ajo drejton në raport me mendësinë dhe argumentin. Por, mbi të gjitha nisur nga etiketimi i Haritos për lidhjet e tij familjare me qeverinë e shkuar, gazetari Peka i kujtoi lidhjet që ministrja ka me Enver Hoxhën duke shtuar se ajo nuk duhet të ishte fare në atë post.
