Ambasadori britanik në Shtetet e Bashkuara, Kim Darroch, ka dhënë dorëheqjen duke shpjeguar se e kishte të pamundur të vazhdonte detyrën e tij, pas rrjedhjes së informacioneve nga kabllogramet diplomatike, ku ai kritikon presidentin amerikan, Donald Trump. “Edhe pse mandati im nuk përfundon deri në fund të këtij viti, besoj se në rrethanat aktuale qëndrimi i përgjegjshëm do të ishte lejimi i emërimit të një ambasadori të ri”, tha Darroch në një deklaratë.
Darroch ka qenë diplomati kryesor i Britanisë në Uashington që prej vitit 2016. Sipas kabllogrameve të bëra tashmë publike, përfaqësuesi diplomatik britanik në SHBA e cilësonte kreun e Shtëpisë së Bardhë si një udhëheqës “të ngathët”, “të pasigurtë” e “të paaftë” dhe administratën e tij si “jofunksionale”.
Pas publikimit të tyre, Trump reagoi me një postim në “Twitter” duke e quajtur Darroch “shumë budalla” dhe një “një njeri të trashë e pompoz”. Ai shkruante gjithashtu se “nuk do të merrej më” me të.
Kabllogramet e publikuara u dërgoheshin ministrave të lartë britanikë dhe nëpunësve civilë, por zyrtarët besojnë se personi që ia ka deleguar shtypit, është politikan apo zyrtar britanik dhe nuk i takon një qeverie të huaj.
