Zyrtarët kinezë njoftuan një rritje të rasteve të reja me COVID-19 në disa provinca. Nisur nga ky fakt autoritetet shëndetësore i kanë kërkuar popullatës të përdorë pajisje personale mbrojtëse.
Në një konferencë për shtyp në Pekin, zëdhënësi i Komisionit Kombëtar të Shëndetësisë Mi Feng njoftoi se gjatë ditës së sotme (e hënë) janë konfirmuar 17 raste të reja me koronavirus.
Zëdhënësi tha se rastet e reja janë vlerësuar si “të importuara” në atë që njihet si rajoni i brendshëm i Mongolisë. Pesë raste janë shënuar në qytetin e Wuhanit, epiqendra e pandemisë, ku muajin e kaluar u zbatuan masa të rrepta izolimi, shkruan zëri i amerikës. Raste ka pasur në tre provinca verilindore, përfshirë Jilin, ku autoritetet pezulluan shërbimin e trenave brenda dhe jashtë qarkut.
Televizioni shtetëror kinez njoftoi se kanë dërguar një ekip ekspertësh në zonat e prekura për të hetuar rreth situatës. Sipas universitetit Johns Hopkins, aktualisht Kina ka më shumë se 84 mijë persona të prekur nga infeksioni viral dhe mbi 4,637 të vdekur.
