Qytetarët janë rikthyer edhe sot në protestë, në atë që konsiderohet si protesta e 24-të radhazi kundër qeverisë dhe kryeministrit Edi Rama. Tubimi ka nisur në Sheshin Skënderbej, ndërsa më pas protestuesit do të marshojnë drejt Kryeministrisë, ku do të kërkojnë largimin e qeverisë dhe dorëheqjen e kryeministrit Edi Rama.
“Rama jepe dorëheqjen”, vijon të jetë refreni i çdo proteste, ditë pas dite. Pas më shumë se tri javësh demonstrata të pandërprera në Tiranë, organizatorët dhe pjesëmarrësit e konsiderojnë protestën si një moment të rëndësishëm të mobilizimit qytetar.
Sipas protestuesve, revolta ka tejkaluar tashmë kauzën fillestare dhe është shndërruar në një lëvizje më të gjerë kundër korrupsionit, keqqeverisjes, mungesës së llogaridhënies dhe largimit të të rinjve nga vendi.
Pjesë e protestave kanë qenë edhe përfaqësues të diasporës shqiptare, të cilët kanë udhëtuar drejt Shqipërisë për t’iu bashkuar tubimeve, duke e cilësuar pjesëmarrjen e tyre si një tregues të pakënaqësisë së shqiptarëve brenda dhe jashtë vendit.
